nṛsiṁha-kavacaṁ vakṣye prahlādenoditaṁ purā |
sarva-rakṣā-karaṁ puṇyaṁ sarvopadrava-nāśanam || 1
sarva-saṁpat-karaṁ caiva svarga-mokṣa-pradāyakam |
dhyātvā nṛsiṁhaṁ deveśaṁ hema-siṁhāsana-sthitam || 2
vivṛtāsyaṁ tri-nayanaṁ śarad-indu-sama-prabham |
lakṣmyāliṅgita-vāmāṅgaṁ vibhūtibhir upāśritam || 3
catur-bhujaṁ komalāṅgaṁ svarṇa-kuṇḍala-śobhitam |
śriyāsu śobhitoraskaṁ ratna-keyūra-mudritam || 4
tapta-kāñcana-saṅkāśaṁ pīta-nirmala-vāsasam |
indrādi-sura-mauli-stha sphuran māṇikya-dīptibhiḥ || 5
virājita-pada-dvandvaṁ śaṅkha-cakrādi-hetibhiḥ |
garutmatā ca vinayāt stūyamānaṁ mudānvitam || 6
sva-hṛt-kamala-saṁvāsaṁ kṛtvā tu kavacaṁ paṭhet |
nṛsiṁho me śiraḥ pātu loka-rakṣātma-sambhavaḥ || 7
sarvago ’pi stambha-vāsaḥ phalaṁ me rakṣatu dhvanim |
nṛsiṁho me dṛśau pātu soma-sūryāgni-locanaḥ || 8
smṛtiṁ me pātu nṛhariḥ muni-varya-stuti-priyaḥ |
nāsāṁ me siṁha-nāsas tu mukhaṁ lakṣmī-mukha-priyaḥ || 9
sarva-vidyādhipaḥ pātu nṛsiṁho rasanāṁ mama |
vaktraṁ pātv indu-vadanaḥ sadā prahlāda-vanditaḥ || 10
nṛsiṁhaḥ pātu me kaṇṭhaṁ skandhau bhū-bharaṇānta-kṛt |
divyāstra-śobhita-bhujaḥ nṛsiṁhaḥ pātu me bhujau || 11
karau me deva-varado nṛsiṁhaḥ pātu sarvataḥ |
hṛdayaṁ yogi-sādhyaś ca nivāsaṁ pātu me hariḥ || 12
madhyaṁ pātu hiraṇyākṣa-vakṣaḥ-kukṣi-vidāraṇaḥ |
nābhiṁ me pātu nṛhariḥ sva-nābhi-brahma-saṁstutaḥ || 13
brahmāṇḍa-koṭayaḥ kaṭyāṁ yasyāsau pātu me kaṭim |
guhyaṁ me pātu guhyānāṁ mantrāṇāṁ guhya-rūpa-dhṛk || 14
ūrū manobhavaḥ pātu jānunī nara-rūpa-dhṛk |
jaṅghe pātu dharā-bhāra-hartā yo ’sau nṛ-kesarī || 15
sura-rājya-pradaḥ pātu pādau me nṛharīśvaraḥ |
sahasra-śīrṣā-puruṣaḥ pātu me sarvaśas tanum || 16
mahograḥ pūrvataḥ pātu mahā-vīrāgrajo ’gnitaḥ |
mahā-viṣṇur dakṣiṇe tu mahā-jvālas tu nairṛtau || 17
paścime pātu sarveśo diśi me sarvato-mukhaḥ |
nṛsiṁhaḥ pātu vāyavyāṁ saumyāṁ bhīṣaṇa-vigrahaḥ || 18
īśānyāṁ pātu bhadro me sarva-maṅgala-dāyakaḥ |
saṁsāra-bhayataḥ pātu mṛtyor mṛtyur nṛ-kesarī || 19
idam nṛsiṁha-kavacaṁ prahlāda-mukha-maṇḍitam |
bhaktimān yaḥ paṭhen nityaṁ sarva-pāpaiḥ pramucyate || 20
putravān dhanavān loke dīrghāyur upajāyate |
yaṁ yaṁ kāmayate kāmaṁ taṁ taṁ prāpnoty asaṁśayam || 21
sarvatra jayam āpnoti sarvatra vijayī bhavet |
bhūmyantarikṣa-divyānāṁ grahāṇāṁ vinivāraṇam || 22
vṛścikoraga-saṁbhūta-viṣāpaharaṇaṁ param |
brahma-rākṣasa-yakṣāṇāṁ dūrotsāraṇa-kāraṇam || 23
bhūrje vā tāla-patre vā kavacaṁ likhitaṁ śubham |
kara-mūle dhṛtaṁ yena sidhyeyuḥ karma-siddhayaḥ || 24
devāsura-manuṣyeṣu svaṁ svam eva jayaṁ labhet |
eka-sandhyaṁ tri-sandhyaṁ vā yaḥ paṭhen niyato naraḥ || 25
sarva-maṅgala-māṅgalyaṁ bhuktiṁ muktiṁ ca vindati |
dvātriṁśati-sahasrāṇi paṭhet śuddhātmanāṁ nṛṇām || 26
kavacasyāsya mantrasya mantra-siddhiḥ prajāyate |
anena mantra-rājena kṛtvā bhasmābhimantraṇam || 27
tilakaṁ bibhṛyād yas tu tasya graha-bhayaṁ haret |
trivāraṁ japamānas tu dattaṁ vāry abhimantrya ca || 28
prāśayed yo naro mantraṁ nṛsiṁha-dhyānam ācaran |
tasya rogāḥ praṇaśyanti ye ca syuḥ kukṣi-saṁbhavāḥ || 29
kimatra bahunoktena nṛsiṁha-sadṛśo bhavet
manasā cintitaṁ yat tu sa tac cāpnoty asaṁśayam || 30
garjantaṁ garjayantaṁ nija-bhuja-paṭalaṁ sphoṭayantaṁ harantaṁ
dīpyantaṁ tāpayantaṁ divi bhuvi ditijaṁ kṣepayantaṁ kṣipantam |
krandantaṁ roṣayantaṁ diśi diśi satataṁ saṁharantaṁ bharantaṁ
vīkṣantaṁ ghūrṇayantaṁ kara-nikara-śatair divya-siṁhaṁ namāmi || 31
iti śrī-brahmāṇḍa-purāṇe prahlādoktaṁ śrī-nṛsiṁha-kavacaṁ saṁpūrṇam ||